केंद्रीय राज्यमंत्र्यांकडून श्रीगोंदा मतदारसंघाचा आढावा!

प्रशासक न्यूज,दि.३१ऑगस्ट२०२४

केंद्र आणि राज्य सरकारच्या सर्व योजना भाजपाचे नेते,पदाधिकारी व कार्यकर्ते यांनी तळागाळापर्यंत पोहोचवून लोक संपर्क वाढवला तर येणाऱ्या निवडणुकीत पक्षाला निश्चितच घवघवीत यश मिळेल,असे प्रतिपादन केंद्रीय युवक कल्याण व क्रीडा राज्यमंत्री ना. रक्षाताई खडसे यांनी श्रीगोंदा येथे भाजपाच्या श्रीगोंदा - नगर विधानसभा मतदार संघाच्या आढावा बैठकीत बोलताना केले.

ना.खडसे पुढे म्हणाल्या राज्यात आपल्याला पुन्हा सत्ता मिळवायची आहे सरकारने अनेक कल्याणकारी योजना आणल्या व राबविल्या आपण याचा सातत्याने पाठपुरावा करावा. श्रीगोंदा मतदार संघात संघटना मजबूत आहे आमदार बबनराव पाचपुते यांचे काम देखील उल्लेखनीय आहे,पण अती आत्मविश्वास नको तर कार्यकर्त्यांनी परिश्रम घेऊन काम करावे.

यावेळी बोलताना आमदार बबनराव पाचपुते म्हणाले मतदार संघात पाण्यापासून सर्व प्रश्न सोडवताना आपण सामाजिक बांधिलकीतून सर्व कामे केली आहेत.तसेच लोकसभा निवडणुकीच्या वेळी वेगळी परिस्थिती होती त्यामुळे मताधिक्य घटले पण विधानसभा निवडणुकीच्या पार्श्वभूमीवर विक्रम पाचपुते व भाजपा पदाधिकारी,कार्यकर्ते सर्व बाबींवर बारीक लक्ष ठेऊन आहेत.त्यामुळे मतदार नक्कीच पुन्हा संधी देतील असा विश्वास त्यांनी व्यक्त केला.

यावेळी विक्रम पाचपुते यांनी प्रास्ताविक करून केलेल्या कामांचा आढावा दिला.तसेच कार्यकर्त्यांनी ना.खडसे यांच्याकडे महायुतीच्या घटक पक्षातील जबाबदार नेते व कार्यकर्त्यांनी लोकसभा निवडणुकीत महायुती उमेदवाराचा प्रचार केला नसल्याचे निदर्शनास आणून दिले.त्यावर ना.खडसे यांनी याचा अहवाल वरिष्ठांना पाठवणार असल्याचे स्पष्ट केले.

यावेळी श्रीगोंदा नगरपालिकेचे माजी नगरसेवक शब्बीरभाई बेपारी व सहकाऱ्यांनी तसेच विविध गावातील कार्यकर्त्यांनी भाजपा मध्ये प्रवेश केला.पत्रकारांशी बोलताना ना.रक्षाताई खडसे म्हणाल्या, आपल्यावर नगर जिल्ह्यातील ६ विधानसभा मतदार संघाची जबाबदारी दिली असून आज आपण ३ मतदार संघात आढावा बैठक घेतली आहे.श्रीगोंदा मतदार संघात आ.पाचपुते यांच्यामुळे पक्षाचे संघटन मजबूत असल्याचा पुनरुचार त्यांनी केला. तसेच आ.पाचपुते यांच्या दूरदृष्टीने अनेक कामे मार्गी लागून कोट्यावधी रुपयांचा निधी प्रत्येक गावाला प्राप्त झाल्याने येणाऱ्या निवडणुकीत पक्षाला निश्चितच यश मिळेल असा विश्वास त्यांनी व्यक्त केला.

यावेळी मा.जिल्हा परिषद सदस्या डॉ.सौ.प्रतिभाताई पाचपुते,दिनूकाका पंधरकर, गणपत दादा काकडे,पोपटराव खेतमाळीस,प्रतापसिंह पाचपुते, बाळासाहेब महाडिक ,संदीप नागवडे, बापू तात्या गोरे, पुरुषोत्तम भैया लगड,मिलिंद दरेकर,धनराज कोथिंबिरे,मंगेश घोडके,शुभांगीताई सप्रे,देवयानी शिंदे,सुजाता खेडकर,विद्या शिंदे, उषाताई कर्डिले तसेच सर्व माजी नगरसेवक,भाजपाचे सर्व प्रमुख पदाधिकारी कार्यकर्ते,महिला भगिनी मोठ्या संख्येने उपस्थित होते.