"टवाळखोरांनो" सावधान! शाळा परिसरात हुल्लडबाजी करणाऱ्यांना पोलिसांचा कडक ईशारा..

प्रशासक न्यूज | श्रीगोंदा |दि.१जुलै २०२६


श्रीगोंदा : शालेय विद्यार्थी व विद्यार्थिनींच्या सुरक्षिततेला प्राधान्य देत श्रीगोंदा पोलिसांनी शाळा परिसरात विशेष धडक मोहीम राबवली. या मोहिमेदरम्यान शाळांच्या परिसरात विनाकारण दुचाकीच्या फेऱ्या मारणाऱ्या, टवाळखोरी करणाऱ्या आणि सार्वजनिक शांतता भंग करणाऱ्या हुल्लडबाजांवर कारवाई करण्यात आली. या कारवाईत दोन संशयित तरुणांना ताब्यात घेण्यात आले.

 तक्रारींची गंभीर दखल

गेल्या काही दिवसांपासून शाळा व महाविद्यालये सुरू होण्याच्या तसेच सुटण्याच्या वेळेत काही तरुण दुचाकींवरून भरधाव वेगाने फेऱ्या मारत असल्याच्या आणि मोठ्या आवाजात हॉर्न वाजवून विद्यार्थिनींना त्रास देत असल्याच्या तक्रारी पोलीस प्रशासनाकडे प्राप्त झाल्या होत्या. त्यामुळे विद्यार्थिनींमध्ये भीतीचे वातावरण निर्माण होत असल्याची बाब समोर आली होती

पोलिसांची विशेष मोहीम

या तक्रारींची गंभीर दखल घेत पोलीस निरीक्षक संजय ठेंगे यांच्या मार्गदर्शनाखाली विशेष पथकाची स्थापना करण्यात आली. दि. १ जुलै रोजी सकाळी व दुपारी शाळा सुटण्याच्या वेळेत साध्या वेशातील महिला पोलीस कर्मचारी व अंमलदारांनी शाळा परिसरात सापळा रचून कारवाई केली.

 मोहिमेदरम्यान करण्यात आलेली कारवाई :

✅ शाळेच्या गेटसमोर विनाकारण थांबलेल्या तरुणांची चौकशी

✅ ट्रिपल सीट व बदललेल्या सायलेन्सरच्या दुचाकींवर कारवाई

✅ हुल्लडबाजी करणाऱ्या दोन तरुणांना ताब्यात

 कडक इशारा आणि समुपदेशन

ताब्यात घेतलेल्या तरुणांवर कायदेशीर कारवाई करण्यात आली असून त्यांच्या पालकांना पोलीस ठाण्यात बोलावून समुपदेशन करण्यात आले. भविष्यात अशा प्रकारची टवाळखोरी अथवा कायदा-सुव्यवस्थेला बाधा आणणारे कृत्य केल्यास थेट न्यायालयीन कारवाई करण्यात येईल, असा कडक इशारा पोलिसांनी दिला आहे.

 पोलीस प्रशासनाचे आवाहन

"विद्यार्थ्यांची सुरक्षा ही आमची सर्वोच्च प्राथमिकता आहे. शाळा किंवा महाविद्यालय परिसरात मुलींची छेड काढणे, विनाकारण फिरणे अथवा गोंधळ घालणे कोणत्याही परिस्थितीत सहन केले जाणार नाही. अशा घटना निदर्शनास आल्यास नागरिकांनी तातडीने '११२' या आपत्कालीन क्रमांकावर संपर्क साधावा. तक्रारदाराची ओळख गोपनीय ठेवली जाईल," असे आवाहन पोलीस निरीक्षक संजय ठेंगे यांनी केले आहे